Natalana karun sa hapon nga maghampang para sa exhibition match sang billiard doubles sanday Billiards legend Efren ‘Bata’ Reyes kag Bacolod City Mayor Alfredo “Albee” Benitez batok kanday Django Bustamante kag Bacolod City Councilor Vladimir Gonzales.
Ang exhibition match ang patigayunon alas-2:00 karun sa hapon matapos ang 2nd Mayor Albee Benitez 10-ball tournament sa Masskara Festival 2023.
Kahapon una na nga nagpatigayon sang exhibition match si Reyes kun sa diin siya ang napierde batok sa Grade 4 student nga si John Andrew ‘Chasz’ Uy.
Sa interview sang Bombo Radyo Bacolod kay Vicente ‘Vic’ Firmeza, tournament director sa Bacolod Masskara Billiards Tournament, gin-athag sini nga si Reyes ang nagpadulong sa syudad bilang special guest nga gin-imbetar sang Bacolod Yuhum Foundation.
Ginalantaw sini nga indi man luyag sang billiards legend nga magdaog sa tanan nga tion rasun kun ngaa ini ang nalutos kahapon.
Pangagda sini sa mga Bacolodnon kag iban mga turista nga luyag magsaksi sa mga pahampang nga magpadulong lamang sa SM City Bacolod kun sa diin ang Top 16 games sang mga nagapasakop sa kompetisyon ang magahampang ala-1:00 sang hapon kag ang event ang tapuson sa exhibition doubles match sang mga billiard legends kag alkalde kag konsehal sa ciudad sang Bacolod.
