Gindeklarar na sang Sangguniang Panlalawigan ang pagpaidalom sa bilog nga Negros Occidental sa State of Calamity kasunod sang paglupok sang Bulkan Kanlaon.
Madumduman nga nagpatigayon sang emergency meeting ang Provincial Disaster Risk Reduction and Management Office kahapon kag nagdihon sang resolusyon nga nagarekomendar sang pagpatuman sang province-wide state of calamity.
Kaina sang aga, gilayon nga nagpatawag sang special session ang 11 ka SP members agud maaprubahan ang rekomendasyon.
Wala naman sang natabo nga pagpamatok kag madasig nga naaprubahan.
Sa interview kay Negros Occidental Vice Governor Jeffrey Ferrer, ang presiding officer, palarehas ang sentimiyento sang kadam-an gani ila nga gin-aprubahan ang endorsement.
Sa pagpaidalom sa province-wide state of calamity, tanan nga local government units sa probinsya ang sarang na nga makatap sa ila nga quick response fund kag ini ang magamit sa pagbakal sang ibulig sa mga nahalitan nga banwa kag ciudad.
Isa man sa target sini ang makapatuman sang price freeze sa mga basic necissities kag prime commodities.
Kasubong man may ikasarang sa pagreallign sang iban nga pondo kasubong man makapatigayon sang iban nga procurement options.
