Gintabunan na ang bintana sang isa ka classroom sa Sum-ag National High School kun sa diin may babayi nga nagapaidalom sa quarantine nga nagreklamo nga ginlingling ini sang isa ka lalaki sang tinalikdan nga adlaw.
Sa interview sang Bombo Radyo kay Bacolod City Councilor Renecito Novero, chairman sang quarantine centers action team sang ciudad, gilayon siya nga nagpadulong sa Sum-ag National High School sang nahibaluan ang reklamo sang Huwebes sang hapon.
Naistorya sang konsehal ang head nurse nga assigned sa pasilidad, kalakip na ang ginapatihan nga suspetsado kag ang kaupod sang ginlingling sa iya nga hulot.
Suno kay Novero, nagbalibad ang babayi nga ginlingling nga magtuad kundi ang roommate sini ang nag-istorya sa head nurse.
Ang suspetsado ang assigned man sa pasilidad halin sang tinalikdan nga tuig apang indi matumod kun may pagpanglingling gid man nga natabo bangud indi magtuad ang nagclaim nga ginlingling.
Ginlantaw man ni Novero ang banyo kag nakit-an nga mataas ang bintana sini halin sa duta kag indi malab-ot kun wala sang tungtungan, apang suno sa konsehal, balde nga may buslot ang nakit-an sa duta nga indi man sarang matungtungan.
Indi personal nga makapati si Novero nga may pagpanglingling bangud wala sang admission kag competent proof sa alegasyon, apang gintabunan nalang ang bintana.
Sa sini nga paagi suno kay Novero, mabatyagan sang mga nagaquarantine nga ginaaktuhan ang ila reklamo kaangay sang natabo sa ETCS IV kun sa diin nadula ang cellphone sang COVID positive.
