Temporaryo nga ginsuspende sang alkalde sang San Carlos City ang bio ethanol plant sa ciudad bangud sa maitom nga tubig nga ginapagwa sini nagikan sa ila pond.
Sa interview sang Bombo Radyo kay Mayor Renato Gustilo, ginpahayag sini nga nauna na ini nga nag-issue sang order nga untaton ang operasyon sang San Carlos Bioenergy Inc. (SCBI) bilang preparasyon sang ginlauman nga paglabay ni Typhoon Auring sa probinsya.
Sang wala natigayon ang bagyo, may mga pumuluyo nga nagreklamo nga may maitom nga tubig sa baybayon sang Sitio Maluluy-on sa ciudad gani nagpatigayon sila sang imbestigasyon kag inspection kag nakumpirmar nga nagagikan ini sa planta.
Bangud diri, nagpatawag sila sang meeting nga gintambungan man sang planta kag ginhambalan nga indi sila pagpahanugutan nga mag-operar tubtob nga mag-improve ang ila nga pond nga ginahalinan sang mahigko nag tubig.
Suno kay Gustilo, nag-ayo ang planta nga tapuson anay ang ila nauna na nga ginagaling gani ginhatagan ini sang duha ka adlaw nga ila ini matapos sumugod subong tubtob sa Biyernes.
Sa Sabado, suno sa alkalde, kun indi magtinlo ang ila nga pond, kinahanglan nila nga magshut down.
