Ginsuguran na sang Bacolod City government ang bag-o nga innovations sa solidwaste management program in partnership sa IPM Construction and Development Corporation ukon ang ginatawag nga biowaste collection nagikan sa mga merkado.
Sa idalom sini, ang mga dunot nga utan ang ginadivert nagikan sa waste stream agud maibanan ang volume sang basura nga nagakadto sa landfill.
Sa interview sang Bombo Radyo kay Ma. Fe Tresfuentes, administrative officer sang Department of Public Services, paagi sa trash to cash nga programa, ginasegregate sang team sang garbage collectors sa Libertad, Burgos kag Central Market ang nasambit nga basura, ginakolekta sang IPM kag ginadeliver sa Fresh Start Organic Farm sa Silay agud nga didto ishred kag iprocess sang kompaniya agud nga mangin abono paagi sa bio-composting.
Suno kay Tresfuentes, padayon ang ila nga information education campaign sa mga yara sa merkado kag nakuha man ang ila suporta.
Diskusyunan naman sang city government kag sang private partner kun ano ang himuon sa naproduce nga biocompost kag ini ang ginalauman nga maplantsa na sa pagsulod sang bag-o nga kontrata sang IPM.
Pasalamatan naman sang city government kun may iban pa nga kompaniya nga willing magbaton sang biowaste nagikan sa Bacolod.
Sang Abril 1, nakadeliver ang ciudad sang 1.5 tons sang basura kag three times a week ang schedule.
Nagalaom naman ang city government nga makadeliver sang 14 tons kada semana agud nga mameet ang requirements para makumpleto ang mixture sa pagproduce sang organic fertilizer.
Nahibaluan nga sa idalom sang Republic Act 9006 ukon Solidwaste Management Act, kinahanglan makuha ang biowaste sa landfill agud mahimo nga fertilizer.
