BACOLOD CITY-Ginkompirmar sang Chief Administrative Officer sang Bureau of Internal Revenue (BIR) Region No. 12 nga nagbalik na operasyon ang ahensya matapos nga ginsirado ini para sa disinfection kasunod sang nagpositibo ang isa ka kliyente sini.
Sa interview sang Bombo Radyo kay Norma Bayoneta, ginpahayag sini nga nagapabilin sa home quarantine ang siyam ka mga nagatrabaho sa BIR Region No. 12 nga ginalakipan sang apat ka mga revenue officers kag lima ka mga security guards.
Ginpahayag man ni Bayoneta nga duha ang may direct contact sa pasyente.
Isa ang nagikan sa Revenue District 76 sa syudad sang Victorias kag Revenue District 77 sa syudad sang Bacolod kag lunsay nagikan sa client support system kag nagcater sang request sang pasyente sa TIN transfer.
Nakadepende sa desisyon sang IATF kun ang siyam ang igaswab apang gin-athag sini nga nagapadayon ang operasyon sang ahensya.
Nagpanugyan man si Bayoneta sa publiko nga wala sang dapat nga kahangaw-an bangud ginhimo man nila ang tanan agud hilway nga makatransact ang ila nga mga kliyente.
Madumduman nga ginpaidalom sa lockdown ang BIR Region No. 12 kag Revenue District 77 sa Barangay Taculing, siyudad sang Bacolod matapos magtransaksyon diri ang isa ka kliyente nga positibo sa COVID-19.
Samtang, nakita naman sang pinuno sang Securities and Exchange Commission (SEC) Bacolod nga maayo ang reception sang mga tawo sa precautionary measures nga ginahimo nila batok sa coronavirus disease.
Suno kay Atty. Annabelle Corall-Respall, apisar nga nagreduce sila sang ginabaton nga mga kliyente bangud halin sa walo, tatlo na lamang ang makatransact subong.
Ginapatuman man sang SEC ang �No Touch Policy� kun sa diin ginabutang sa drop box ang mga dokumento kag ginapainitan sa sulod sang apat tubtob lima ka adlaw.
Ginpasiguro man sini nga ginahimo sang SEC ang ila katungdanan apisar nga skeletal kag work from home sila.
Nagpanawan man ini nga mangin responsable na lamang ang tagsa-tagsa sa pag-amlig sang kaugalingon kag nagapangabay nga hangpon ang mga protocols bangud luyag lamang nila nga proteheran ang mga vulnerable sa masakit.
