Nagalaom ang bise alkalde sang Bacolod nga ikonsiderar sang national inter-agency task force (IATF) ang hingyo sang city government nga I-extend ang enhanced community quarantine sa ciudad tubtob Mayo 15.
Madumduman nga nagpasar sang resolusyon ang Sangguniang Panlungsod sang Bacolod kun sa diin naga-apelar ini sa national IATF nga I-extend ang enhanced community quarantine sang 15 ka adlaw.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga alang-alang pa nga ilift ang ECQ sa Bacolod sa Abril 30.
Suno diri, mas maayo nalang nga mangin safe sangsa maghinulsol sa ulihi.
Suno sa iya, may yara pa sang active cases sa ciudad kag may masobra 100 pending test results pa nga ginahulat.
May mataas man nga posibilidad nga may yara sang local transmission sa Bacolod bangud may mga COVID patients diri nga wala sang travel history.
Apisar nga nalipay ini nga gin-classify sang national IATF ang ciudad bilang low-risk area, indi sa gihapon sigurado nga hilway na ang Bacolod sa COVID-19.
Apang, pananglitan nga indi maaprubahan sang IATF ang apelasyon sang ciudad, nagpasalig si Familiaran nga magasunod ini sa mando sang national government nga mag-downgrade na sa General Community Quarantine ang Bacolod. Samtang, nagapati si Bacolod City Lone District Congressman Greg Gasataya nga may yara sang valid reason agud nga palawigon pa ang enhanced community quarantine sa ciudad tubtob Mayo 15.
Sa interview sang Bombo Bombo Radyo Bacolod kay Gasataya ginpahayag sini nga dako na ang nasakripisyo sang tanan bangud sa coronavirus disease 2019 gani nga indi dapat magdesisyon nga alang-alang pa ang sitwasyon.
Suno kay Gasataya, nag-inquire pa ini sa Department of Health Region 6 agud mahibaluan ang status sang Bacolod bangud madamo pa ang pending nga test results nagikan sa laboratory center sa Iloilo.
Paathag sini, dapat mahibaluan anay ang resulta sang tanan nga nakuhaan sang swab sample antes magdesisyon nga ilift na ang ECQ.
Dugang pa sang kongresista, kun idowngrade sa general community quarantine ang Bacolod, indi na makabaton sang second tranche sang cash grant sa idalom sang Social Amelioration Program sang Department of Social Welfare and Development (DSWD) ang masobra 98 mil ka mga benepisyaryo sa ciudad.
Suno kay Gasataya, dako ini nga butang para sa mga pumuluyo nga dapat ikonsiderar.// Nahibaluan nga ang ECQ sa Bacolod ang magatakop bwas, Abril 30.
