Ginpahayag sang council president sang Partido Demokratiko Pilipino (PDP)- Negros Occidental nga wala sila nabalaka sa pag-resign sang bise-alkalde kag mga konsehal sa ciudad sang Victorias sa PDP.
Sang Martes, ginpadala kay PDP President Jose Alvarez sa Manila headquarters ang letter para sa “irrevocable resignation” nga pirmado nanday Vice-Mayor Abelardo Bantug III kasubong man sang mga konsehal nga sanday Francis Frederick Palanca, Teresita Bartolome, Deilen Hofileña, Hermie Millan, Dino Jose Maria Acuña, Dexter Senido, Danilo De Asis Jr., Joji Larraga, kag Audie Malaga.
Sa interview sang Bombo Radyo Bacolod kay Party Deputy Secretary General for Visayas Atty Jayvee Hinlo, wala sang may nadula sa PDP kasunod sa ila nga resignation.
Suno diri, humalin sang siya nagsulod sa party list, nag-ampo ini nga ang partido ang magabulig sa tawo humalin sa dalum tubtob sa babaw kag wala sa ila ang ugali nga nagalumpat-lumpat.
Pahayag ni Hinlo, magkaupod sila ni former Victorias City Mayor Wantan Palanca nga nagsumpa sa PDP kag dapat nga dayaw ini sa ciudad sang Victorias bangod ang pinalangga nila nga anay alkade ang gin-imbita sang isa ka national party bilang bise presidente.
Apang sa karun, gin-athag sini nga padayon nila nga ginapangaluyagan si Palanca nga magpapili bilang gobernador sang Negros Occidental bangod nga siya ang may tagipusuon kag wala nagatinir sa opisina para magpa-aircon, apang ini ang nagagwa kag nagabulig sa pigado.
Samtang, wala pa ini ginbaton ni Palanca kag nagsabat nga padayon pa ini nga nagapangamuyo bangod ang pagka-gobernador ang dako nga posisyon.
Sa pagresign sang bise-alkalde kag mga konsehal sa ciudad sang Victorias sa PDP bangod nga mahimo nga si Palanca ang iduso sang PDP nga magpapili bilang gobernador nga suno sa ila ang desisyon ang wala sang konsultasyon nagikan sa ila, suno kay Hinlo, dapat nga ini pa gani kun tani ang ila nga ipadayaw bangod nga may tsansa nga magagikan sa ciudad sang Victorias ang mangin gobernador.
