Ginpanugyan sang Bise Alkalde sa ciudad sang Bacolod ang mga luyag kuntani nga magpapili sa Barangay and Sangguniang Kabataan Elections nga indi dapat madula ang inspirasyon nga magserbisyo.
Sa interview sang Bombo Radyo Bacolod kay Vice Mayor Claudio Jesus “Kalaw” Puentevella, naluoy man ini sa pila ka mga aspirant nga naggasto na para sa mga tatpaulin.
Ginapakamaayo na lamang sini nga nahisayran na ang issue, kag sila ang nagatinguna na lamang nga mapahangop sa tanan ang desisyon sang duha ka balay sa Kongreso kag pag-ugyon sang Presidente.
Aminado si Puentevella nga okay man kun nadayun ang eleksyon para may-ara sang fresh mandate, makabutang sang bag-o nga opisyal, bag-o nga representasyon, bag-o nga programa kag priorities.
Apang bangod may desisyon na sa extension, pahanumdom sang Bise Alkalde nga ini ang dapat respetuhon man.
Panugyan sini sa mga magapapili kuntani, nga indi mangluya, kag kun handom gid ang pagserbisyo, madasig lamang ang duha ka tuig.
Dugang pa niya nga ang sensiridad sa pagserbisyo ang wala nagatakop sa pwesto, bangod ini ang mahimo gihapon bisan wala sa gobyerno.
Sa pihak nga bahin, ang Bacolod City officials upod sa Department of the Interior and Local Government ang nagalibot man sa mga Barangay.
Ini agud maseguro nga nagapatigayon sang session ang mga Barangay officials kag ginahimo ang ila mandato.
Pahanumdom ni Puentevella sa mga incumbent public officials nga indi magpakatawhay karun nga na-extend ang ila termino, sa baylo dapat nga mas ayuhon pa ang pagserbisyo.
