Gin-athag sang bise alkalde sang ciudad sang Bacolod nga wala nag-negatibo kag nagpositibo liwat sa coronavirus disease 2019 (COVID-19) si Patient No. 5.
Sa interview sang Bombo Radyo Bacolod kay Vice Mayor El Cid Familiaran nga chairman sang inter-agency task force against coronavirus sa ciudad, ginpahayag sini nga wala nag-negatibo sa balatian ang 28-anyos nga lalaki nga may yara sang travel history sa Estados Unidos kag Manila kag residente sang Doña Juliana Subdivision, Barangay Taculing.
Suno sa iya, yara sa maayo nga kondisyon kag naka-home quarantine sa karon ang pasyente apang positibo ini gihapon sa COVID-19.
Sa pinakaulihi nga data nga ginpagwa sang Bacolod City Health Office, nagapabilinaaaaa sa siyam ang kaso sang COVID-19 sa Bacolod kun sa diin duha diri ang napatay na nga amo sanday Patients No. 6 kag 8.
Lima na ang kabug-usan nga naka-recover sa balatian nga ginalakipan nanday Patient No. 1, 2, 3, 4, kag 7.
Apang si Patient No. 3 ang padayon sa gihapon nga naka-admit bangud sa pre-existing health condition sini.
Naka-admit man sa ospital ang pinakaulihi nga narekord nga kaso sang coronavirus sa ciudad nga si Patient No. 9 nga taga-Purok Bayanihan sa Barangay Banago.
