Nakuha na sang pamilya ang bangkay sang napatay nga gina-alegar katapo sang New People’s Army sa engkwentro nga nagluntad sa Sitio Angalan, Barangay Quintin Remo, Moises Padilla sang Huwebes sang aga.
Sa interview sang Bombo Radyo Bacolod kay Moises Padilla Vice Mayor Ian Villaflor, ang napatay ang ginkilala nga si Marlo Catacio alyas Malot, 24 anyos kag residente sa nasambitan nga Barangay.
Ang bangkay sini ang ginclaim sang iya pamilya sang Huwebes sang gab-i.
Ginpadulungan man mismo sang bise alkalde ang lugar nga ginluntaran sang engkwentro agud maghatag sang bulig sa mga nag-evacuate.
Suno diri nagdangat sa 29 ka panimalay ukon 157 ka indibidwal ang mga nag-evacuate nga ginhatagan sang Department of Social Welfare and Development (DSWD) assistance sang local government unit (LGU) samtang sa kaugalingon sini nga kapasidad, ang bise alkalde ang nagpanghatag man sang foodpacks nga ginalakipan sang tag-lima ka kilo nga bugas kag mga delata kag noodles.
Matapos ang pagpanatag, ginapakamaayo ni Villaflor nga amat-amat naman nga nakabalik ang mga evacuees sa ila tagsa ka panimalay.
Aminado ini nga nabukid na nga bahin sang banwa ang Sitio Angalan, kag ini ang yara na sa boundary sang Negros Occidental kag Negros Oriental.
Sa paghinun-anon sini sa mga pumuluyo, kalabanan sa ila ang nagapanguling kag nagatanom sang mga agricultural crops nga ila naman ginabaligya sa Barangay.
Magapangita man ini sang ideya nga mahatagan sang sustainable livelihood program ang mga pumuluyo.
Panawagan naman sini sa mga residente sa lugar nga ireport kun may makita nga grupo nga indi tumandok sa lugar, bangod kun pahanugutan lamang ang mga rebelde ini ang makadala lamang sang kahalitan.
Hingyo naman sini sa mga rebelde nga magbalik na sa sabak sang gobyerno, nga madamo man sang mga programa nga gina-offer nga makabulig sa panibag-o nga pagpangabuhi.
