Aminado ang bise alkalde sang ciudad sang Bacolod nga dako nga pagpanghangkat sa mga kapulisan ang asod-asod nga pagpamatay kun sa diin ang pagtumba kay Roland Tan ang pinakaulihi.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga dapat padasigon ang mga imbestigasyon sa nagluntad nga krimen sa ciudad agud mahatagan sang hustisya ang kamatayon sang mga biktima.
Suno diri, kun masolbar ang kaso kag mahatagan sang hustisya ang kamatayon sang isa ka biktima, mahatagan man sang peace of mind ang mga pumuluyo sang ciudad kag ang krimen ang ginasolbar sang kapulisan.
Ginpahayag man sini nga kun wala sang COVID, nakainstall na sang CCTV kag dako na kuntani nga bulig sa imbestigasyon sang mga kapulisan.
Apisar nga may CCTV sa mga pribado nga mga establishmento nga malapit sa crime scene suno kay Familiaran, wala ini sang kasiguruhan nga nagaandar ini sa tion sang natabo ang krimen.
