Nagapati ang bise alkalde sang Bacolod City nga maapektuhan ang ekonomiya sa away nanday Vice President Sara Duterte kag President Ferdinand “Bongbong” Marcos Jr.
Sa interview sang Bombo Radyo Bacolod kay Vice Mayor El Cid Familiaran, sa personal sini nga panan-aw tuman na ka divisive ang pamulitika sa Pilipinas.
Nagalaom na lamang ini nga magbulig ang mga anay nangin Presidente sang pungsod sa pagmediate sang away politika.
Suno diri, kuntani mangin focus sang mga opisyal ang pagserbisyo sa mga pumuluyo ukon paghatag sang programa nga makapatin-ad sang kabuhi sang constituents.
Ini bangod ang pagtin-ad sang pagpangabuhi sang pumuluyo ang katumbas man sa pagtin-ad sang ciudad ukon banwa.
Suno diri, sa nagakatabo nga away sa politika, ang mga pigado amo ang labi nga makaluluoy.
Paathag sini nga bangod sa away politika mahimo magduha-duha ang mga investors sa pagsalig sang ila kwarta bangod sa indi mapaktan nga mahimo matabo.
Kun wala sang investments, magahinay man ang development ukon pag-umwad sang pungsod.
Sa pihak sang nagakatabo sa national level, pasalig ni Familiaran nga ang mga public officials sa Visayas ang magapadayun lamang sa pagserbisyo sa mga pumuluyo.
