Nagalaom ang bise alkalde sang Bacolod nga mangin madasig ang pagsolbar sa kaso ni Punong Barangay Romeo Canlas Jr. nga gintiro-patay sang nagligad nga Sabado sang gab-i.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga nagaasalig siya nga masolbar sang kapulisan ang kaso kag matumod ang mga suspetsado.
Madumduman nga naga-inom-inom ang biktima upod ang anom ka mga abyan sang nakibot na lamang ang mga ini nga may nagpalapit sa ila nga anom ka mga naka-bonnet nga armado nga mga lalaki kag nagpamangkot kun kilala nila si alyas “Ferlyn”.
Ginpahapa ang mga ini samtang ginapamangkot kun ano ang ila pangalan.
Hinali na lang nga ginpatindog si Canlas kag ginpahigad sang mga armado kag gintiro sang makapila ka beses.
Gilayon naman nga nagpalagyo ang mga suspetsado sakay sa pribado nga salakyan.
Ginhingagaw pa dala sa Corazon Locsin Montelibano Memorial Regional Hospital si Canlas apang gindeklarar nga dead on arrival.
Nahibaluan nga may yara karon sang tatlo ka mga anggulo nga ginalantaw ang kapulisan tuhoy sa motibo sa krimen.
Una diri, ang kaangtan sa illegal nga droga bangud yara sa drugs watchlist sang BCPO si Canlas sang 2018.
Ginalantaw man nga anggulo ang personal grudges bangud posible nga may yara ini sang kontra.
Wala man ginadula ang anggulo may kaangtanan sa politika.
Nahibaluan nga si Canlas ang nagapanguna nga barangay kagawad sa ila nga barangay.
