Nagapati ang bise-alkalde sang Bacolod City nga malapit na lang maguba ang health system sa ciudad bangud sa COVID-19 pandemic.
Sa interview sang Bombo Radyo kay Vice Mayor El Cid Familiaran, ginpahayag sini nga magluwas nga puno na ang bed capacity sang mga ospital, madamo naman sang mga health workers ang natapikan sang virus gani madamo man ang mga nagaresign.
Suno kay Familiaran, tuman na kalain sang sitwasyon sa mga ospital gani nagahingyo ang medical sector sang duha ka semana nga break agud makarecharge.
Nagalaom man ini nga kuntani maintindihan sang publiko ang sitwasyon nga indi na lahug-lahug kag halungan gid ang ikaayong lawas para indi man makahalit sa iban.
Gin-athag man sini nga indi matuod nga wala ginbaton sang ospital ang 33-anyos nga COVID frontliner nga nagtaliwan sang Agosto 23.
Suno sa bise-alkalde, may yara sang ginasunod nga protocol ang mga ospital kag ang napulo ka mga pasyente nga nauna sa iya ang mas kritikal ang kondisyon.
Sa bahin naman sang mass testing, suno kay Familiaran, iga-isolate naman ang mga ini kun magpositibo sa RT-PCR test.
Nahibaluan nga may apat ka klasipikasyon ang mga pumuluyo nga sarang nga makapakigbahin sa mass testing.
Ini ang ginalakipan sang mga nakaclose contact sang isa ka pasyente nga positibo sa COVID-19; mga persona nga may maluya nga immune system kag pre-existing conditions; may sintomas sang virus kaangay sang ubo, hilanat, pagkadula sang panabor kag panimaho; kag mga vulnerable individual kaangay sang mga senior citizen, menor de edad, empleyado sang BPO, empleyado sang gobyerno, PNP, mga nagabusong, PWDs kag mga frontliners.
