Nagapasalamat ang bise-alkalde sang ciudad sang Bacolod sa kooperasyon sang mga pumuluyo sa ginapatuman nga lockdown kun Dominggo nga adlaw.
Nahibaluan nga ini na ang ikaduha nga Dominggo nga wala ginapahanugutan ang mga residente nga magwa sa ila mga puluy-an bilang kabahin sang mando ni Mayor Evelio “Bing” Leonardia kaangot sa enhanced community quarantine sa ciudad.
Sa interview sang Bombo Radyo kay Vice Mayor El Cid Familiaran, ginpahayag sini nga makabig nga memorable ang tinalikdan nga Dominggo bangud pwerte ka tawhay sang dalan subong man ang karun nga adlaw.
Suno kay Familiaran, nagakalipay ini nga makit-an nga nagakooperar ang mga residente kag nagalaom nga magpadayon ini tubtob sa Mayo 1.
Ginakonsiderar man sini nga padayunon na lang ang pagpatuman sang lockdown kun Dominggo apisar nga malift na ang ECQ bangud sa maayo sini nga epekto.
Nagalaom man ang bise-alkalde nga mahatagan sang insakto nga desisyon ang alkalde tuhoy sa ECQ apang suno sa iya, posible nga i-modify ini.
