Nagpundo ang motorsiklo bangud nagpula na ang traffic light apang naghingagaw pa tabok ang container truck nga ginamaneho ni Jemmy Panes, 26 anyos, kag may address nga Camias San Miguel, Bulacan bisan indi na kuntani pwede gani nasalakay sini ang motorsiklo.
Naglasik ang bata nga si Venice Areglo nga nagapungko sa tung-anan sang iya amay nga si Jude Jett Areglo nga amo ang nagamaneho sang motorsiklo kag sang iloy nga si Shiela Mae Areglo, lunsay mga residente sang Barangay Guinpana-an, Moises Padilla.
Sa interview sang Bombo Radyo kay Vice Mayor Ian Villaflor, bag-o gid lamang nakagwa sa ospital ang mag-asawa apang indi pa sini maistorya ang iloy nga si Shiela Mae, nga nahibaluan nga nagabusong sang tatlo ka bulan, bangud may yara ini sang trauma.
Naistorya naman sini ang amay nga si Jude Jett nga may buho sa natuo nga paa sini bangud sa impact sang aksidente.
Yara naman sa punerarya ang tatlo ka tuig nga bata.
Samtang, igapaagi naman sa regular filing ang pagpasaka sang kaso sa driver sang container truck bangud naglapse na ang reglimentary period.
Suno kay Villaflor, wala gid nakapabatyag ukon nakapalapit sa pamilya ang tag-iya sang cargo truck humalin sang natabo ang aksidente.
Suno diri, nabudlayan ang mag-asawa bangud sila ang pigado lamang kag makaluluoy ang sitwasyon.
Gani nagapangabay ini sa tag-iya sang cargo truck nga si Boy Reyes nga atubangon ang problema nga ginhimo sang iya driver agud nga mabatyagan man sang pamilya nga willing sila magbulig sa sitwasyon sang mga biktima.
Nagapati ang bise-alkalde nga apisar nga aksidente ang natabo, sala gid sang container truck ang natabo bangud yara man sa insakto nga lugar ang motorsiklo.
Suno diri, plano sang pamilya nga magfile sang kaso batok sa tag-iya sang container truck agud iya maatubang ang ginhimo sang driver sini.
