Ginpablotter ang bise-alkalde sang banwa sang Murcia matapos gintampa ang 15 anyos nga bata nga lalaki.
Ang biktima amo ang 15 anyos nga bata nga lalaki nga Grade 9 student, kag residente sang Purok Kasantolan 2, Barangay Vista Alegre, ciudad sang Bacolod.
Sa panaysayon sang biktima, masami ini nga nagatambay kaupod ang iya mga abyan sa Bacolod Gold Country Club sa Hacienda Binitin, Barangay Blumentrit, banwa sang Murcia.
Suno diri, humalin pa sadto ginahangkat sila sang away sang hinablos ni Murcia Vice Mayor Johnny Reosura kag ang pakaisa sini ang nagsumbag sa hinablos kag indi siya.
Nobyembre 2, 2023, alas 11;00 sang udto ginpatawag ni Reosura ang 15 anyos nga lalaki sa tindahan sang utod sini agud nga areglahon ang natabo.
Pag-abot didto sang bata kaupod ang iya tiya, ginpangita ni Reosura ang bata kag sang nagpalapit ini sa iya, siya ginpamnagkot kun diin ang pichicorno nga ila gingamit sa pagsumbag sa iya hinablos.
Nagsabat ang bata nga wala ini sa iya kag siya ginhambalan ni Reosura nga “KUN INDI MO PAGKWAON POSASAN TA KAMO KAG DAL-ON”.
Nagpauli ang bata para kuhaon ang pichicorno kag sa pagbalik sini sa bise alkalde, ginkuha ni Reosura ang pichicorno kag hinali lang nga gintampa ang bata.
Ginpisga pa sini ang guya sang bata kag ginhanaan nga sumbagon gamit ang pichicorno.
Samtang suno kay Lorlyn Bibaoco, tiya sang bata, kun pwede lang tani nga indi lang pagsakiton ang bata kag hambalan lang sang sala nga ginhimo.
Dugang pa sini, away bata lang man ini kun tani nga pwede lang madala sa pagsturyahanay kag I-settle nga wala lang sakitanay.
Ang saksi sa natabo nga pagpanampa ni Murcia Municipal Vice Mayor Johnny Reosura, amo gid lamang ang tiya sang 15 anyos nga bata, ang mga pakaisa sini kag ang hinablos sang bise alkalde.
Sa pagpakig-angot sang Bombo Radyo Bacolod kay Murcia Municipal Vice Mayor Johnny Reosura, iya ginpahayag nga may yara sang lamud-pulitika sa likod sini.
