Nagpaathag ang bise alkalde sang banwa sang San Enrique, Negros Occidental sa ginpasar sang mga ini nga resolusyon sa pagpaidalom sa banwa sa state of calamity bangud sa epekto sang hog cholera sa hog industry sang banwa.
Sa interview sang Bombo Radyo Bacolod kay Vice Mayor Carlo Magno, ang resolusyon ang gindiskyunan man antes gin-aprubahan.
Suno kay Magno, ang tinutuyo lamang sang resolusyon ang paghatag sang sentimyento sa mga apektado nga nagasagod sang baboy sa banwa sang San Enrique kag mahatagan sila sang nagakaigo nga bulig.
Suno sa bise alkalde pro-active action sang Sanguniang Bayan ang ila nga ginpagwa nga resolusyon ukon paghimo sang tikang nga magbulig kun may yara sang mabulig sa mga apektado nga mga residente kag wala na sang iban pa nga rason.
Suno kay Magno, ang mortality sa banwa sang San Enrique sa mga ginasagod nga baboy ang nagdangat na sa 1,800 gikan sa 700 sang tinalikdan nga semana.
Suno pa sa bise alkalde ginasuportahan man nila ang mga tikang sang executive kag ang ila nga resolusyon ang para lamang magpabutyag sang ila sentimyento sa mga makaluluoy nga mga residente sang banwa nga naapektuhan sang hog cholera.
