Nagapati si Bishop Gerardo Alminaza sang Diocese of San Carlos nga kulang sa giya ang duha ka mga miyembro sang LGBT community nga nagbinastos sa Dinagsa Festival sa ciudad sang Cadiz kadungan sang pagsaulog sang kafiestahan ni Sr. Sto. Nino.
Sa interview sang Bombo Radyo Bacolod kay Bishop Alminaza, ginpahayag sini nga naluoy siya sa ginhimo sang duha ka mga agi nga ginkilala kanday alias Boomba Wilma kag alias Laura Beatrice Buenavista nga lunsay taga ciudad sang Silay bangud ginapakanubo lamang nila ang ila mga kaugalingon sa ila nga ginhimo.
Suno diri, posible nga nagapangita lamang ang duha sang acceptance kag pagpalangga apang sa sala nga paagi.
Nagpanugyan na lamang si Alminaza sa publiko nga imbes ipakamalaot ang duha, maghimo na lamang sang tikang agud mabuligan ang duha.
Ginadayaw man sini ang pagpatawag ni Cadiz City Mayor Salvador Escalante sa duha ka mga agi agud nga malaygayan kag mahatagan sang penalidad.
Nagalaom si Alminaza nga indi na kuntani masulit pa ang kaangay nga hitabo.
