Gin-athag ni Bishop Gerardo Alminaza sang Diocese of San Carlos nga ang pagpahanugot sang Santo Papa sa pagbindesyon sang mga kaparian sa mga same sex couple ang wala nagakahulugan nga ginapaboran na ang same sex marriage.
Sa interview sang Bombo Radyo Bacolod kay Alminaza, indi dapat ma misinterpret ang statement ni Pope Francis.
Suno sa pari may mas malapad nga kahulugan ang blessings.
Paathag sang pari nga ang pagpahanugot sang Santo Papa ang para sa bendisyon sa indibidwal nga persona apisar nga yara sa irrigular nga sitwasyon.
Ini ang kaangay lamang sa mga naga-ayo pagkatapos sang misa sa simbahan nga sila ang mapangamuyuan sang pari, para sa kaadlawan, kun may kasal-anan kag iban pa.
Wala nila ginadingot sa mga nasambitan nga persona ang bulig kag kaluoy sang Ginoo apang ini ang wala nagakahulugan nga ginakonsente nila ang sala.
Paathag sini nga nagapabilin ang panindugan sang simbahan sa topiko sang pagpangasawa.
Suno diri ang Simbahang Katoliko ang nagapati nga sa kasal, procreation ang tinutuyo sang Diyos gani sila ang wala gid naga-upod sa same sex marriage.
Dugang pa sini nga indi man mabendisyunan sang pari ang same sex couple kun luyag nila nga bendisyunan ang ila pag-updanay, sa baylo ang pari sarang makahatag sang blessings agud nga magiyahan sila sa husto nga desisyon.
Agud malikawan ang confusion, ginadumilian ang pagbendisyon sa same sex couples nga nakabesti nga kaangay sang nagpakasal kag iban pa nga mahimo makahatag sang sala nga interpretasyon.
