Kabug-usan nga 242 ka mga pasahero, drivers kag helpers, 17 ka mga vessels kag 60 ka mga rolling cargoes ang na-stranded sa mga pantalan sa Negros Occidental bangud kay Bagyo Vicky.
Sa interview sang Bombo Radyo Bacolod kay Commander Ludovico Librilla, pinuno sang Coast Guard Station-Negros Occidental, ginpahayag sini nga may yara sang 198 ka mga pasahero nga sakay sa 2Go nga barko padulong kuntani sa Cagayan de Oro ang stranded sa Bredco port.
Samtang, gin-abisuhan naman kahapon ang mga pasahero nga magatabok kuntani sa Iloilo nga magbalik nalang sa tagsa nila ka mga panimalay kag hulaton nga mabatak ang storm signal.
Liwat naman ini nga nagpanugyan sa mga mangingisda sa magagmay nga mga sakayang-pandagat nga likawan anay ang paglayag bangud nga may yara pa sang bagyo.
Takna alas-11:00 kaina sang aga sang ginbatak sang Pagasa ang storm signal number 1 sa Negros Occidental kag Iloilo.
Bangud diri, automatic nga nagresume na ang biyahe sang Bacolod-Iloilo vice versa.
