Gin-athag sang Weesam express nga ginhimo apat ang departure trips sang ila barko gikan sa BREDCO port humalin sang Christmas holidays, apang ini ang mahimo nga magpanaog sa tatlo sa masunod nga semana.
Paathag ni Frank Carbon, operator sa Weesam express nga antes ang Desyembre 2022, ang byahe sang Weesam express ang yara lamang sa duha ka round trips kag duha man gikan sa isa pa ka fast craft operator ukon kabug-usan nga apat ka departure trips.
Samtang apat man ang Departure trips gikan sa Iloilo padulong sa Bacolod City.
Apang sang Christmas holidays, ginpasakaan sang mga ini ang trips sa apat kag ginhimo man sang isa pa ka operator nga apat ang ila nga departure ukon kabug-usan nga walo ka byahe.
Ini ang ginalakipan sang apat ka byahe sa aga kag apat man sa hapon kun sa diin halos kada oras may-ara sang departure.
Paathag ni Carbon nga ang full capacity sang barko sa kada byahe ang yara sa 180 tubtob 200 ka pasahero, kun sa diin sang Desyembre tubtob sa karun, ang ila average capacity ang nagdangat na sa 70 porsyento ukon 120 tubtob 140 ka pasahero.
Suno sa operator, maayo na ini nga load factor ukon load capacity.
Nagapati si Carbon nga magapadayun pa ang madamo nga numero sang sumalakay ilabi na nga may mga nag-extend ang bakasyon samtang ang iban ang amat-amat na nga nagabayhe pauli.
Ginalantaw sini nga magadangat pa sa Biyernes ang maayo nga numero sang mga pasahero sa pantalan, apang sa masunod nga semana ini ang mahimo nga magbalik na sa normal.
Bangod sini, ginapaabot naman ni Carbon ang posibilidad sang pagbuhin sang trips.
Apang paathag sini nga indi na sila magbalik sa duha ka departure trips, kundi himuon na lamang nga tatlo ka trips sa isa ka adlaw.
Ang desisyon ang magadepende naman sa volume sang pasahero samtang isa naman sa rasun sa mahimo pagnubo sang byahe amo ang tuman nga pagsaka sang fuel cost.
Paathag sini nga 30 tubtob 40 porsyento sang kita sang mga ini ang nagakadto sa gatong, gani indi makabayad kun dyutay ang pasahero sa kada byahe.
Pahanumdom ni Carbon sa mga byahero nga magpadulong sa pier isa ka oras antes ang schedule nga byahe kag magdala lamang sang dyutay nga butang agud indi mabudlayan.
