Balik na ang byahe sang mga barko nga nagalayag Bacolod-Iloilo vice versa sa Sabado, Mayo 16.
Sa MARINA advisory no. 2020-29, nakabutang ang guidelines tuhoy sa resumption sang operation sang passenger ships sa mga lugar nga yara sa idalom sang general community quarantine kag enhanced community quarantine.
Suno sa MARINA, ginadumilian sa gihapon ang operasyon sang mga passenger ships sa mga lugar nga yara sa idalom sang ECQ samtang pahanugutan na ang operasyon sang mga passenger ships sa mga lugar nga yara na sa idalom sang GCQ kaangay sang Bacolod City kag Negros Occidental apang subject ini sa mga istrikto nga mga kondisyon.
Ang mga passenger ships na naga-operate sa mga lugar nga yara sa GCQ ang indi sarang makalayag padulong sa mga lugar nga yara sa ECQ.
Ginmandu man sang MARINA ang pag-obserbar sang social distancing kun sa diin dapat nga may yara sang isa ka metro nga distansya ang duha ka persona sa tanan nga tinion.
Suno sa ahensya, 50 porsyento lamang sang regular on-board capacity sang mga barko ang pahanugutan nga makasakay agud mapabilin ang physical distancing sa ila kag sa mga crew.
Mandatory naman ang pagcheck sang body temperature antes makasaka sa barko ang mga pasahero kag crew samtang mandatory man ang pagsuksok sang face mask.
