Gina-imbestigahan pa sang Bureau of Jail Management and Penology ang impormasyon nga nagikan sa sulod sang prisuhan ang persona nga nagamando sang pagbaligya sang illegal nga druga sa Bacolod City kag Negros Occidental.
Sa interview sang Bombo Radyo kay BJMP 6 Spokesperson Jail Chief Inspector Atty. Jairus Anthony Dogelio, nakabaton sila sang nasambit nga impormasyon kag nagapakig-angot sa Philippine National Police tuhoy diri.
Suno kay Dogelio, nakahimo naman sang mga tikang ang mga jail units kag may action plans na ang regional office kasubong man sang mga measures nga igaimplementar.
Wala naman sini ginadula ang posibilidad nga kalabanan sa mga nagakadakpan sa mga drug buybust operation, nagahambal na lamang nga nagikan sa sulod BJMP ang ila source bangud matapos na ang inquiry.
Apisar sini, wala nila ginadula ang posibilidad nga may kamatuoran ang nasambit nga mga pahayag gani nagacoordinate sila sa PNP agud matapna ang kaangay nga mga buluhaton.
Wala man nila ginatolerate ang personal nga paggamit sang cellphone apang bangud nga may COVID-19 pandemic, ila ginpahanugutan ang E-Dalaw sa cellphone ukon tablet apang hugot ini nga ginamonitor.
Hugot man nila nga ginabantayan ang mga nagasulod nga mga pagkaon kag gamit sa jail facilities.
Suno kay Dogelio, kada bulan nagapatigayon ang mga ini sang jail inspection apang sa karun tinguhaan nila nga ini ang mahimo kada adlaw.
