Istriktuhon sang Bureau of Jail Management and Penology Region 6 ang pag-usisa sa ginabaton nga pagkaon ukon bayo sang mga priso sa ila nga detention facilities.
Kasunod ini sang pagpalagyo sang lima ka mga priso sa Negros Occidental District Jail sang Martes sang kaagahon kun sa diin tatlo pa sa mga ini ang padayon nga ginapangita, isa ang napatay sang mga pulis kag isa ang liwat nga naaresto.
Suno kay Jail Chief Inspector Jairus Anthony Dogelio, spokesperson sang BJMP Region 6, ginapatihan nga nakasulod ang lagari nga gingamit nanday Francisco Epogon, Marvin Celeste, Daniel Celeste, Alejandro Montoya kag Danilo Tamon bangud sa “paabot” ukon pagduhol sang pagkaon kag iban nga kinahanglanon sang priso.
Suno diri, ginsuspendi ang visitation sang himata sang mga priso bangud sa COVID pandemic apang ginabaton sang BJMP personnel ang luyag nga ihatag sang pamilya sa priso.
Suno diri, 15mm ang kabilya sa bintana sang NODJ nga ginlagari sang mga inmates.
Kasunod sang insidente, istriktuhon sang BJMP ang pag-usisa sa mga ginaduhol agud indi makasulod ang matalom nga bagay.
Kadungan sini, ginkumpirmar man ni Dogelio nga ipaidalom sa swab test si Danilo Tamon antes ini ibalik sa selda.
Sa karon, yara si Tamon sa isolation facility samtang wala pa ang swab test.
Suno kay Dogelio, ang mga priso halin sa kabanwahanan ukon kaciudaran ang ginabutang sa isolation facility kag ginapaidalom sa swab test antes ginasimpon sa una nga mga priso agud mapunggan ang pagsulod sang coronavirus sa detention facility.
