Nagalaom ang Bureau of Jail Management and Penology Negros Island Region nga mas magadamo pa ang numero sang mga persons deprived of liberty sa rehiyon nga makatapos sa kolehiyo paagi sa College Behind Bars Program.
Sa interview sang Bombo Radyo kay BJMP NIR spokesperson Jail Senior Insp. Juniven Umadhay, tuyo sang College Behind Bars Program nga hatagan sang second chance ang eligible nga priso nga makaangkon sang oportunidad sa personal development kag makatrabaho kun makagwa na sa prisuhan.
Sa karon, ang partner institutions sang BJMP NIR amo ang Bago City College, Bacolod City College, State University of Northern Negros kag St. Joseph College of Canlaon.
Sang July 23, 2026, nagpirma naman sang Memorandum of Agreement ang BJMP kag Negros Oriental State University sa Dumaguete para sa School Year 2026-2027.
Sang August 7, 2026, nagpirmahanay man sang MOA ang BJMP kag Siquijor State College.
Agud nga maqualify, kinahanglan sang high school graduate nga PDL nga makapasar sa entrance examination nga nakapattern sa ila sitwasyon.
Kun makapasar, magapaidalom ini sa interview.
Suno kay Umadhay, libre ang tuition sang PDLs.
Sarang sila nga makapili sa kurso nga BS in Office Administration, BS Information System, BS Business Administration, BS Agricultural Business, BS Entrepreneurship, kag BS Library Administration.
Sang 2024, isa ka babayi nga PDL sa Escalante City Jail ang nakagraduate sa kolehiyo paagi sa College Behind Bars Program.
Nakapyansa ang nasambit nga PDL gani nagalaom si Umadhay nga magamit niya ang iya diploma samtang pending ang trial sang iya kaso. Samtang, ginapasalamatan sang Bureau of Jail Management and Penology Negros Island Region ang tanan nga mga nagasuporta sa College Behind Bars Program sang ahensya.
Sa interview sang Bombo Radyo kay BJMP NIR spokesperson Jail Senior Insp. Juniven Umadhay, ginapatuman ang College Behind Bars Program sa bilog nga Negros Island Region bangud nagabuligay ang BJMP kag higher education institutions.
Magluwas diri, supportive man ang mga local government units sa mga jail facilities para sa internet connection kaangay sang Cadiz, Escalante, San Carlos, Bacolod City.
Suno kay Umadhay, ginahatagan sang modules ang PDL agud tun-an kag sabtan apang may mga tinion nga kinahanglan nila magpartisipar sa online classes.
Suno sa iya, may facilities man ang BJMP para sa online classes kag ginasupervise lang sang jail officers ang PDL.
Positibo man ang feedback sang pamilya sang mga PDLs sa sini nga programa.
Suno kay Umadhay, dako ang bulig sang pamilya bangud collective effort sang PDL, BJMP, partner institution kag sang pamilya ang nasambit nga programa.
Ang College Behind Bars Program ang instrumento agud nga matuman ang mandate sang BJMP nga irehabilitate ang PDLs agud nga mangin productive nga tawo kun makagwa na sa prisuhan paagi sa pagkambyo sang behavior, paglantaw sa kabuhi kag paghatag sa ila sang ikaduha nga tsansa.
