Ginahingyo sang spokesperson sang Bureau of Jail Management and Penology-Negros Island Region sa pamilya sang mga Persons Deprived of Liberty (PDLs) nga buligan sila sa pagtinlo sang Negros Occidental District Jail paagi sa pagsiguro nga wala sang makasulod nga illegal nga butang ukon kontrabando.
Sa interview sang Bombo Radyo Bacolod kay Jail Senior Inspector Juniven Umadhay, spokesperson sang Bureau of Jail Management and Penology – Negros Island Region, kun sinsiro ang mga pamilya sang PDLs nga yara sa karun sa NODJ dapat magsunod ang mga ini sa patakaran nga ginapatuman sa tion nga magbisita sa ila nga mga himata sa sulod sang jail facility.
Suno kay Umadhay dapat buligan sila nga indi makasulod ang mga illegal nga mga butang.
Pila sa mga ginadumilian ang cellphone, illegal drugs kag bladed weapons.
Sang tinalikdan nga mga semana may yara sang nakuha nga illegal nga druga sa bed banks kag ini ang nakumpiskar kasunod sang intelligence report nga ang bed banks sa Dormitory 21 kag sa insular ang may illegal nga druga.
Ang mga PDLs ang wala man sang nag-ako kun sin-o ang nagapanag-iya sang nakumpiskar nga illegal nga druga.
Isa pa ang cellular phones bangud ang mga PDLs ang nagakuha sang video kag ipost online kag ini man ang isa ka palaagyan nga magapadayon sa gihapon ang paghimo sang illegal nga transaksyon apisar nga nakahunong na sa NODJ ang isa ka persona.
Suno kay Umadhay ginahingyo sang mga ini ang PDLs kasubong man ang pamilya sang mga ini nga magsunod sang tanan nga mga pagsulundan bangud nasanto man ini sa layi agud nga malab-ot ang tinutuyo sang regional director sang Bureau of Jail Management and Penology-Negros Island Region nga maglimpyo kag mangin maayo ang sitwasyon sang jail facilities sa rehiyon kasubong man ang mga PDLs.
