Kapin 13 ka tuig antes napasar sang BJMP officer ang BAR Exam.
Si Senior Jail Officer III, Jerson J. Varon kag sa karun Attorney na, ang nagpakigbahin sang iya naeksperyensyahan samtang nagaeskwela ini sa Law School kadungan sang iya duty bilang jail officer sa Bureau of Jail Management and Penology sa Isabela District Jail.
Suno kay Varon, nag-enroll ini sa 5 Year Program sang University of Negros Occidental Recoletos para sa mga employed nga law student bangud sadto nga tion yara na siya sa BJMP.
Nakagraduate si Varon sang 2017 kag nagkuha sang BAR Exam sang 2018 kag 2022 apang napaslawan ini kag wala nakapasar.
Suno sa iya, nagpangduha-duha ini nga padayunon ang abogasya bangud ikaduha na ka beses nga wala siya nakapasar.
Bangod dako na ang iya nga sakripisyo lakip na diri ang oras para sa pamilya gani wala ini nadulaan paglaum kag liwat nga nagkuha sang exam sang nakaligad nga tuig 2025.
Ginpakigbahin ni Varon nga nagself-study ini sadto apang nagdesisyon siya nga mag-enroll sa online review center.
Pahayag ni Varon, mangin mapinaubos, batunon ang kritisismo, mga pahanumdom kag magpursige agud makuha ang ginalauman nga propesyon.
