Nagsabat ang tagpamaba sa Bureau of Jail Management and Penology (BJMP) sa panawagan ni Bacolod Police Station 8 station commander P/Maj Joery Puerto nga ang mga ini ang magpublic apology kasunod sa pagwaragwag sang mga nadakop sa buybust operation nga ang katransaksyon sang iligal nga droga ang yara sa sulod sang Metro Bacolod District Jail sa Barangay Taculing.
Madumduman nga nakadakop man sang tinalikdan nga Pebrero ang Bacolod Police Station 8 sang mga drug personalities nga nagtuad nga ang druglord nga ila ka transaksyon ang yara sa sulod sa BJMP facility kag nakasecure man ini sang ebidensya.
Apang nagrequest si BJMP 6 Spokesperson Jail Chief Inspector Atty Jairus Anthony Dogelio sang public apology sa hepe bangod sa pag-ulamid sini sa pangalan sang bilog nga BJMP nga gilayon man nga ginbuhat ni Puerto.
Apang kasunod sang liwat nga pagkadakop sang mga personalidad nga sa isa ka priso nagatransaksyon nga amo naman ang nagapahulag sang supply sa sagwa, nagapanawagan man sang pasaylo nagikan sa BJMP si Puerto kag nagpanawagan man sa mga jail personnel nga himuon sang maayo ang ila nga responsibilidad
Suno kay Dogelio, nakasugilanon na sini sadto si Puerto kag may kasugtanan naman ang mga ini nga inkaso nga may matabo nga kaangay nga sirkumstansya, ila na ini pungkuan kag diskusyonan.
Nagahingyo man ini nga indi nagakaigo nga iwaragwag gilayon sa publiko ang problema bangod dapat nagabuligay sa pagtrabaho ang mga ahensya sang gobyerno sa pagtrabaho batok sa kaangay nga problema.
Nagpasalig man ini nga wala nagapabaya ang Regional Jail Bureau kag wala man nila ginatolerar ang irigularidad.
