Sa baylo nga maglagaw kag magselebrar upod ang iya nga pamilya kag mga abyan, mas ginpili sang 27-anyos nga lalaki ang magdonar sang dugo sa Dugong Bombo 2019 sa City Mall Mandalagan nga nagtuon sa iya nga kaadlawan.
Sa interview sang Bombo Radyo Bacolod kay Jeric Balunon, residente sang Palaka Sur, Pulupandan, ginpahayag sini nga madugay na niya nga plano ang magdonar sang dugo bangud wala niya pa ini maubra kag gusto niya nga maekspersyahan.
Suno kay Balunon, imbis nga magselebrar upod ang iya nga pamilya kag mga abyan, mas ginpili sini nga magdonar sang dugo bangod mas may balor ini nga bagay.
photo by Bombo news team
Aminado siya nga nakabatyag siya sang kakulba bangud ini ang iya nga first time apang sang matapos ang blood donation, tuman ang iya nga kalipay bangud nahibaluan niya nga dako ang nakadtuan sang iya nga gamay nga sakripisyo.
Gindugang niya man nga nagkinahanglan man sang dugo ang iya nga lolo kag lola sang una gani isa ka rason sa iya nga pagdonar ang makabulig man sa iya nga pamilya.
Nag-ugyon man ang isa ka miyembro sang Negros Mixed Rider’s Club sa Dugong Bombo 2019 sa City Mall Mandalagankahapon.
Sa interview sang Bombo Radyo Bacolod kay Ian Aligpangod, ginpahayag sini nga nakabaton ang ila nga grupo sang imbitasyon halin sa Bombo Radyo kag ini ang ila nga gintalakay sa ila nga meeting sang Sabado.
Suno kay Alipangod, sang nahibaluan niya nga may nasambit nga aktibidad, ginplanuhan sini gilayon ang pagdonar sang dugo.
Suno sa iya, una ini nga beses nga nagdonate siya sang dugo kag wala gid siya naghinulsol sa iya nga ginhimo.
