Pasakaan sang kaso sang Talisay City Police Station ang gwardiya nga nagpalupok sang armas-luthang sa Hacienda San Antonio 2, Barangay Dos Hermanas, Talisay City, Negros Occidental, kahapon.
Sa interview sang Bombo Radyo Bacolod kay Police Major Rhazl Jim Jocson, Deputy Chief of Police sang Talisay City Police Station, sang nakita nila ang video kag may nagreport sang insidente gilayon man sila nagproceed sa area.
Suno diri, una nga ginpahalin sang gwardiya ang mga nagaubra sa duta gani may nagluntad nga mainit nga pagbinaisay nga nagtrigger sa gwardiya nga magpalupok sang armas-luthang.
Suno kay Jocson, ginblotter naman ang insidente kag nakuhaan naman sang affidavit ang mga biktima agud nga mapasaka ang nagakaigo nga kaso.
Suno kay Jocson, natumod naman ang suspek kag ang mga security guard ang ginkuhaan man sang affidavit sang mga kapulisan.
Ginpahayag man sang Deputy Chief of Police nga sa pagpalupok sang armas sang gwardiya, ini ang may ginlapas nga layi.
Suno kay Jocson, grave threat, illegal discharged of firearm, paglapas sa RA 10591 ukon Comprehensive Firearms and Ammunition Regulation Act kag Comelec Gunban ang mahimo pangatubangon sang suspect.
