Patay ang isa sa board of directors sang pribado nga eskwelahan sa shooting incident nga naglunatd sa Barangay Dancalan, Ilog, Negros Occidental pasado alas-7:30 kaina sang aga.
Ang biktima ang ginkilala lamang nga si Alyas Pat, isa sa board of directors sang Dancalan Private Academy.
Ang suspek ang ginkilala kay Vannie Galagate alyas Dodoy, 34 anyos, kag residente Sitio Gusnit, Barangay Pinggot, Ilog, Negros Occidental.
Sa interview sang Bombo Radyo Bacolod kay Police Major Randy Babor, hepe sang Ilog Municipal Police Station, gindul-ong sang biktima ang iya asawa sa buluthuan apang makaligad ang pila ka minutos nagpalapit ang suspek kay Alyas Pat kag gintutokan sini ang biktima sang armas-luthang kag maayo lang nga wala ini naglupok.
Gilayon nga ginkuha sang ni Alyas Pat ang iya man nga armas kag nagbalos sa suspek.
Nagbaylohanay sang pila ka lupok ang biktima kag suspek apang natigayon nga naigoan si Alyas Pat nga nagresult sa iya gilayon nga kamatayon.
Samtang, may police personnel nga nakabati sa mga lupok kag gilayon nga nagresponder.
Pag-abot sang kapulisan, nagahamyangon na si Alyas Pat samtang malagyo na kuntani ang suspek.
Gin-manduan sang kapulisan ang suspek nga magsurrender apang nagbato ini kag ginpalukpan ang otoridad.
Gilayon man nga nagbalos ang kapulisan kun sa diin naigo sa li-og si Galagate nga gintunaan sang kamatayon sini.
Samtang, yara na sa estable nga kondisyon ang lalaki nga tricycle driver nga nasalabat sa shooting incident.
