BACOLOD – Ginlamon sang kalayo ang isa ka boarding house sa ciudad sang Talisay, kagab-i.
Nalab-ot pa sang kalayo ang isa ka classroom sang Talisay Elementary School.
Suno kay Archie Narciso, construction worker sang nasambit nga eskwelahan, nagapahuway sila sang duha pa niya ka mga kaupdanan sa obra, sang hinali lang nila natalupangdan nga nagakalayo na ang isa ka hulot-klasehan sa likod nga bahin sang eskwelahan.
Dugang pa ni Narciso nga dako na ang kalayo sang ila ini nakit-an.
Gilayon sila nga nagbinuligay agud mapalong ang kalayo samtang wala pa nakaabot ang mga bombero.
Natigayon naman nga natapna sang katapo sang Bureau of Fire Protection (BFP) ang sunog kag nagdeklarar nga fire out na ini.
Padayon pa sa gihapon nga ginahibalo kun gamiton ang nasunog nga classroom para sa patigayunon nga Barangay and Sangguniang Kabataan (SK) elections subong nga adlaw.
