Madugay na nga abandonado ang bodega sa Barangay Busay, Bago City nga ginbutangan sang 1,000 ka sako nga brown sugar nga ginkawat sang duha ka driver nga nagpagwa nga sila ang ginhijack kag sang mga kakunsabo sini.
Sa interview sang Bombo Radyo kay Punong Barangay Glen Dagunan sang Barangay Busay, wala ini nakahibalo nga may unod nga kalamay ang bodega sang Negros Kabisig Livelihood Foundation, Inc.
Suno diri, 2017 pa ulihi ini nga ginagamit kag ini ang semi-private ukon katunga ang ginapanag-iyahan sang gobyerno.
Suno sa iya, nagabulad ini sang humay kahapon sang nakit-an sini nga madamo sang mga nagpadulong sa lugar kag lunsay mga otoridad.
Ginpamangkot sini kun sin-o ang caretaker kag iya gintawgan ang gwardiya nga si Boy Salmayor, nga 15 ka tuig na nga nagatrabaho sa nasambit nga lugar.
Ginkuha ini sang kapulisan kasubong man ang isa ka persona nga kilala lamang kay Poloy nga amu ang nagpatigayon nga madiskarga ang kalamay.
May ginhire man nga siyam ka mga residente sang barangay agud mag-ariya sang 1,000 ka sako sang kalamay kag wala pa ang mga ini nabayaran.
Sa karun yara sa kustodiya sang Bago City Police Station ang duha ka driver nga sanday Michael Orquin kag Jhujiet Arsenio, ang gwardiya kag si Poloy kag ginakabig nga mga suspetsado.
Samtang, makabig naman nga persons of interest ang tanan nga imbolbado sa nasambit nga transaksyon.
