Wala natigayon nga makuha sang pamilya ang body parts sang ila himata nga una na nga nasapwan nga ginbilin sa gwa sang National Bureau of Investigation (NBI) – Bacolod office sang Marso 1.
Kaina, kaupod ang mga kapulisan sang Bacolod Police Station 2, nagpadulong ang live-in kag anak ni Baltazar Lamata ang tag-iya sang body parts nga nasapwan sa gwa sang NBI sa ABES funeral homes agud nga i-claim na kuntani apang wala ini makuha bangud kinahanglanon sang death certificate.
Ginpanugyanan man ang pamilya sang sekretarya sang punerarya nga makig-angot sa Local Government Unit agud nga mahibaluan kun ano ang maayo nga himuon bangud kinahanglanon sang death certificate sang biktima agud nga makuha ang body parts.
Gintinguhaan sang Bombo News Team nga makakuha sang bahin sang pamilya sang biktima apang wala ang mga ini nagpainterview.
Madumduman nga nakaligad nga semana, nagmatch ang DNA test nga ginpatigayon sa body parts nga kag sa bata sang gina-alegar biktima.
Ang DNA test result gikan sa Negros Occidental Police Provincial Office (NOCPPO) ang nakagwa sang Abril 14.
Samtang ang resulta sang test ang parehas man sa una na nga kumpirmasyon sang NBI sang Abril 12 nga si Baltazar Lamata amo ang nagapanag-iya sang nawala nga kamot, nawala nga tiil kag pares sang dulunggan.
Nahibaluan nga nagpatigayon sang separado nga imbestigasyon ang Bacolod Police Station 2 kag ang NBI-Bacolod natuhoy sa kaso.
Ini bangod kalakip sa body parts, yara man ang sulat nga nagapahayag “William de Arca NBI protector ni Hanz Lopez drug lord”, kag si William de Arca ang isa sa mga agents sang ahensya.
