Plano nga ibalik ang 300 ka mga body cameras nga ginbakal agud gamiton sang mga traffic enforcers sa Bacolod City matapos nga matukiban nga isa ka oras lamang ang masarangan sang battery sini.
Sa interview sang Bombo Radyo Bacolod kay Bacolod Traffic and Transport Management Department officer-in-charge Patrick Leonard Lacson, ireklamo pa sini sa supplier ang nabatun nga bodycam bangod sang ila nga gintest, isa ka oras lamang ang gindugay sang battery sini.
Panindugan sini nga ang kinahanglan nila amo ang body cam nga maka-andar sa bilog nga shift sang traffic enforcers ukon at least walo ka oras.
Aminado man si Lacson nga siya ang may kapaltahan bangod ang pinakabarato nga body cameras ang ila nga ginpili baklon.
Nahibalun nga P800 lamang ang balor sang tagsa ka bodycam kag mahimo wala man nakonsiderar sang General Services Office ang specification sang produkto.
Tinguhaan ni Lacson nga mabalik sa supplier ang bodycams bangod ini ang wala sang pulos kun isa ka oras lamang ang kalawigon sang function.
Paathag sini nga ang rasun sa ila pagprocure sang body cameras ang agud mangin transparent ang serbisyo sang mga traffic enforcers, nga mangin ebidensya man sa mga alegasyon sang anomalya kasubong man nagaserbe nga safeguard sa mga traffic enforcers, nga kun kis-a ginapasibangdan sa sala nga pagpanakop.
Apang hinali nga indi na mahimo mabalik ang mga bodycams, pangitaan na lamang nila ini sang iban nga magamitan agud indi mauyang ang gastos sang ciudad.
Paathag ni Lacson nga ginbakal ang mga bodycams sa idalom pa sang Bacolod Traffic Authority Office (BTAO) nga under sa Office of the Mayor.
Karun nga na-aprubahan na nga mangin departamento ang Bacolod Traffic and Transport Management Department (BTTMD), sila ang may kaugalingon na nga budget sa 2026.
Suno kay Lacson, kun sila ang magbakal sang bag-o nga bodycams sa masunod nga tuig, nagalaom ini nga mahangpan sang mga nagabayad sang buwis kun medyo mahal na ang ila baklon.
