Nafile na ang complaint batok sa bodyguard nga ginalantaw suspect sa pagluthang-patay sa iya boss nga negosyante sa Barangay Villamonte, Bacolod City sang Lunes sang hapon.
Ang biktima ang ginkilala nga si Jun Alaba, residente sang Barangay Estefania, Bacolod City samtang ang suspect amo si Ronel Rafael, 34 anyos, residente sang banwa sang Toboso.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 4, ang complaint ang nafile na sang imbestigador sang Bacolod Police Station 4 kaupod ang complainant nga pamilya ni Alaba.
Una na nga ginpahayag ni Depasucat nga halos tanan nga mga circumstantial evidence ang nagatudlo sa body guard.
Magluwas sa wala sang igo sang bala sa salakyan, narecover man ang empty shell kag bala sa salakyan.
Ang biktima amo ang nagadrive sang salakyan samtang sa passenger seat naman ang bodyguard kag ang igo sang biktima ang yara sa iya nga kilid.
Sa imbestigasyon natumod nga nagapa-utang ang negosyante samtang ang iya bodyguard ang nagapatigayon sang kliyente kag nagabaton sang porsyento.
Ginalantaw ang posibilidad nga may nagluntad nga pagba-isay samtang yara sa sulod sang salakyan, nagpukutay sang armas, tubtob nga natiruhan si Alaba.
Isa sa mahimo rasun amo ang kulang nga remittances sang kwarta ukon wala nasukot nga utang.