Para sa obserbasyon sang isa ka abogado kag konsehal sang ciudad sang Bacolod, mahimo nga mapaidalum sa krimen nga unjust vexation kag grave oral defamation ang ginhimo sang konduktor sang RSJ Lines nga nagbody shame sa 19 anyos nga estudyante.
Sa interview sang Bombo Radyo kay Bacolod City Councilor Atty. Renecito Novero, ang konduktor sang modern jeep nga si Richard Amor, mahimo nga mapasakaan sang kaso nga unjust vexation bangod nga indi matarong ang pagtublag sini sa balatyagon kag panghuna-huna sang tawo ilabi na ni Lanimae Joy Libo-on Mag-aro kag grave oral defamation kun sa diin ginapakahuy-an ang isa ka persona bangod sa iya physical situation sa atubang sang kadam-an.
Suno kay Novero, pwede nga makafile sang kaso kag makapa-blotter ang 19 anyos nga si Lanimae Joy Libo-on Mag-aro batok sa konduktor.
Sarang ini nga maka-file sang reklamo sa barangay nga residente ang konduktor kag kun didto ini maareglo, pwede ini makadiretso sa Prosecutor’s Office kag mag-file sang criminal complaint.
Samtang, suno kay Novero posible nga indi hungod sang konduktor ang nahambal sini apang bangod may namitlang ini nga indi matarong, ini ang nagapakita lamang nga indi matarong ang tinutuyo sini.
Panugyan ni Novero, maghalong kag magpaminsar antes magbuya sang tinaga nga kun ikaw mismo indi sigurado mas maayo nga indi na lang pag-ihambal.
