Nagpatigayon sang Bomb Explosion Simulation Exercise ang mga kapulisan kaina sang aga sa Bacolod City Public Plaza.
Sa interview sang Bombo Radyo Bacolod kay Police Lt Jester Mingues, assistant chief sang Explosive Ordnance Disposal and Canine Unit – Negros Island Region, ginpatigayon nila ang SiMex agud maseguro ang kahandaan sang mga kapulisan upod sa EOD and K9 units sa kaangay nga mga insidente.
May duha ka team sang EOD-K9 unit ang gindeploy nga ginalakipan sang gikan sa Regional Explosive Ordnance Disposal and Canine Unit (RECU) kag Provincial EOD-K9 unit, kun sa diin duha man ka canine dogs ang ila nga gingamit.
Ang isa ka unit ang magasakop sa Uppereast Megaworld kag Bacolod City Government Center, kag ang isa ang magasakop naman sa Bacolid City Public Plaza, Lacson Tourism Strip, kag SM City Bacolod.
Panugyan ni Mingues nga kun may magluntad nga paglupok ukon pamahog sang bomba, indi dapat magpanic, bangod mas makatuga sang trahedya kun may magluntad nga stampede.
