Ginkumpirmar ni Police Major Eugene Tolentino, Station Commander sang Bacolod Police Station 1 nga hoax ukon bomb joke lamang ang bomb threat nga nabaton sang Rizal Elementary School sa Bacolod subong nga Martes sang aga.
Naglapta sa social media ang post sang pagpamahog sa pila ka eskwelahan sa Bacolod City kag Negros Occidental.
Sa post sang facebook account nga may pangalan Lucian Andre Salve, ini ang nagmensyonar sang pila ka eskwelahan sa ciudad sang Bacolod, kag Hinigaran National High School.
Wala man ini nagpahayag kun ano ang ila nga ibutang sa mga buluthuan apang pahayag sini nga sila ang magasuksok sang ID kag uniporme sang eskwelahan.
Dugang pa sini nga mahimo man nila nga ihaboy pasulod sa pader sang eskwelahan ang kun ano man nga ginatumod sang mga ini, apang sa pamahog, ginapahayag nga sila ang madamo.
Sa interview sang Bombo Radyo kay Tolentino, ginpahayag sini nga alas-9:40 kaina sang aga, nakabaton ang ila station sang tawag gikan sa principal sang nasambit nga eskwelahan angot sa bomb threat nga naglapta sa social media.
Gilayon sila nga nagresponde kag nangayo sang assistance sa Regional EOD and K9 Unit – NIR.
Wala naman nagkansenlar sang klase ang eskwelahan apang gindumilian ang mga manunudlo kag estudyante nga maggwa sa classroom for safety purposes.
Negatibo naman ang resulta sang panelling, kag wala sang may nakita nga explosive.
