Ginklaro ni Bacolod City Mayor Greg Gasataya nga negatibo ang nabaton nga gina-alegar bomb threat sa Mariano G. Medalla Integrated School sa Barangay Pahanocoy, Bacolod City, kahapon, Hulyo 21.
Suno sa pahayag ni Bacolod Secretary to the Mayor Atty. Marty Go nga nagpagwa ang alkalde sang isa naman ka statement bangud may yara sang isa ka eskwelahan sa Bacolod City nga nahinambit sa iya sa social media post nga nakabaton sang gina-alegar bomb threat.
Suno kay Go, sa impormasyon nga nabaton sang Bacolod City Government nga alas 12:30 ang takna kahapon sang udto nga nakabaton sang 911 call ang mga otoridad may kaangtanan sa gina-alegar nga bomb threat ang eskwelahan.
Gilayon man ini nga ginrespondehan sang personnel sang Bacolod City Police Station 8 kaupon ang Explosive Ordnance Disposal and Canine (EOD/K9) Unit agud nga isecure ang eskwelahan kag makaoordinar sa school administration.
Matapos ang maidid nga inspection, ginkumpirmar sang mga otoridad nga wala sang nakit-an nga explosives sa eskwelahan.
Dugang pa ni Go, nga ginakondenar sang Bacolod City Government ang malisyoso nga pagpamahog nga nahatag sang kahadlok sa mga educational institutions.
Madumduman nga isa man ka unibersidad sa ciudad ang nakabaton man sang kaangay nga pamahog.
