Kaso nga homicide ang nagahulat sa isa ka bombero kun ini ang maumpawan matapos ang pagbun-anay nila sang pareho niya nga bombero sa Christmas Party nila sa Bureau of Fire Protection (BFP) Bacolod, kahapon sang kaagahon.
Ini ang ginpahayag sang commander sang Police Station 2 nga si Police Major Sherlock Gabana, kasunod sang insidente kun sa diin napatay si Fire Office 3 Isaac Cabana matapos sila nga nagbun-anay ni FO3 Cornelio Silva sa Purok Fire, Brgy. 8, Bacolod City.
Yara pa karun sa pribado nga hospital sa ciudad sang Bacolod si Silva apang suno kay Gabana, kun ini ang maumpawan, pasakaan ini sang kaso nga homicide.
Apang depende naman sa gihapon sa pamilya ni Cabana ang desisyon kun ila ini dayunon.
Sa karun, padayon pa nga ginatumod sang Police Station 2 kun anu gid ang gintunaan sang away sang duha kag ang motibo sa krimen.
Madumduman, nakit-an na lamang sang ila mga kaupdanan nga nagahaksanay ang duha apang ulihi nila natulupangdan nga naga-agay na ang dugo sa lawas sang duha ka bombero.
