BACOLOD CITY — Sunod-sunod nga pasidungog kag pagkilala ang nabaton sang DYWB Bombo Radyo Bacolod subong nga bulan sang Agusto bangud sa kontribusyon sa komunidad sa pagkolekta sang dugo.
Huwebes sang hapon, nangin recipient ang Bombo Radyo sang Philippine Red Cross Blood Services Scroll of Honor award.
Diri ginakilala ang dako nga suporta kag aktibo nga partisipasyon sa recruitment sang mga blood donors agud nga mapasiguro ang bastante nga supply sang dugo sa probinsya sang Negros Occidental.
Kaina sang hapon, mismo ang station manager sang Bombo Radyo Bacolod nga si Bombo Mary Divine Grace Cuello kag assistant station manager Bombo Rommel Jamero ang nagbaton sang award kadungan sang “Handog Pasasalamat” kag Awarding Ceremony nga ginpatigayon sa Social Hall sang Negros Occidental Provincial Capitol.
Madumduman nga sang nagligad nga tuig, nakuha sang Bombo Radyo ang rekord nga may pinakamadamo nga successful blood donors nga natipon sa isa lang ka adlaw nga bloodletting activity sa bilog nga probinsya.
Sang Agusto 4, nagbaton man ang estasyon sang Certificate of Recognition kag Outstanding Non-LGU Award nagikan sa provincial government kag nagaisahanon lamang ini nga radio station sa Bacolod kag Negros Occidental nga ginpasidunggan sa Provincial Sandugo Awards.
