Nadugangan naman ang inspirasyon sang Bombo Radyo Bacolod sa paghatag sang maayo nga serbisyo publiko matapos nga liwat nakabaton sang award gikan sa BILIB sang Communication Department sang University of Saint La Salle-Bacolod.
Ginkilala bilang best AM radio station ukon AM RADIO STATION OF THE YEAR ang DYWB Bombo Radyo Bacolod.
Sa interview sang Bombo Radyo Bacolod kay Marnelle Glazelda Valdevieso, Event Director, 24th Bilib Awards, ang Bilib awards ang ginapatigayon kada tuig sang Communication Department sang University of St. La Salle-Bacolod agud nga kilalahon ang indi matupungan nga outputs sang mga estudyante, faculties kag mangin ang media outlets.
Ang 24th BILIB AWARDS ang may tema nga Mahika: Gawa Mula sa Wala.
Ini ang ginpatigayon sa fern garden sa Barangay Villamonte, Bacolod City kagab-i.
Suno kay Valdevioso, ang award ang gindihon sang 3rd Year Communications students sang University of St La Salle.
Suno kay Valdevieso, ang pagkilala sa DYWB Bombo Radyo Bacolod bilang best AM radio station ang resulta sang ginpatigayon nga surveys sa lima ka mga colleges sa University of St. La Salle-Bacolod.
Ang mga ginpanghatagan sang survey form amo ang mga estudyante nagikan sa College of Arts and Sciences; College of Business Administration, College of Nursing kag College of Engineering.
Suno diri, gintally nila ang score agud nga makita ang nagdaog kag gin-invite sa ginpatigayon nga Mahika: Gawa Mula sa Wala event agud nga mahatag ang award.
Suno diri, ginpatigayon nila outdoor ang event agud nga mangin mas heart warming ang paghatag sang pagkilala.
Ginpanginbulahan sini ang DYWB Bombo Radyo Bacolod sa pagdaog bilang Best AM Radio Station sa pila na ka beses kag ginpasalamatan ang tanan nga nagbuylog kag nagsuporta agud nga mapatigayon ang 24th Bilib awards.
Ginbaton naman sang Assistant Station Manager sang Bombo Radyo Bacolod ang pagkilala nga ginhatag sang BILIB sang Communication Department sang University of Saint La Salle-Bacolod.
Sa speech ni Bombo Erlyn Bayonita-Arroyo, in behalf sang management sang Bombo Radyo Bacolod ginapasalamatan sini ang pagkilala kag ini ang nagahatag sang dugang nga inspirasyon agud nga mas pasanyugon pa gid ang ginahatag nga serbisyo sa publiko ilabi na ang paghatag sang nagakaigo kag insakto nga impormasyon agud pakigbatuan ang Fake news nga madata sa karun.
