Padayun ang pangagda sang Bombo Radyo Bacolod sa mga pumuluyo nga buylugan ang tuigan nga “Dugong Bombo: A Little Pain, A Life to Gain” sang Bombo Radyo Philippines kag Philippine Red Cross.
Sa opening speech ni Bombo Daniel Lecciones, ang station manager sang Bombo Radyo Bacolod, ginapasalamatan sini ang management sang City Mall Mandalagan nga ginpahanugutan ang paggamit sang ground kag second floor sang mall para sa bloodletting activity.
Pasado alas-6:00 sang aga, sarado pa ang mall, nakita na ang paghulat sang pila ka blood donors apisar nga alas-8:00 sang aga pa nagbukas ang registration.
Ginapahanumdom man nga ang pagdonar sang dugo ang indi lamang ordinaryo nga butang bangod ini ang makapalawig sang kabuhi.
Suno kay Bombo Dan, madamo sang mga nagasaka sa Bombo Radyo Bacolod station nga Dugong Bombo donors nga ginahatagan sang referral nga kinahanglan lamang ipakita sa Philippine Red Cross agud mahatagan sang dugo.
Sa gamay nga sakit, sarang man nga mangin baganihan kag makasalbar sang kabuhi.
Gani sa masunod nga tuig, pangagda sang station manager nga padayun nga mag-upod sa ginapatigayon nga tuigan nga Dugong Bombo bangod ini ang may maayo man nga benepisyo sa lawas.
