Bangud sang kahangawa nga kastiguhon siya sang kapulisan, ginpili sang isa sa apat ka mga nagpalagyo nga priso Bacolod Police Station 3 nga sa Bombo Radyo Bacolod magsungka.
Pasado alas-7:00 kagab-i sang nagpadulong sa estasyon ang iloy ni Michael Peñoso nga si Ma. Sally agud magpangayo sang bulig bangud magasungka na ini.
Diri na kag gin-facilitate sang Bombo personnel nga masugat si Michael sa ginpanaguan sini matapos magpalagyo sa Station 3, Lunes sang kaagahon.
Pasado alas-10:00 kagab-i sang tigayon nga nakaabot sa estasyon si Michael gikan sa ginpanaguan sini sa Purok Balinday, Brgy. 2.
Sa interview diri, gin-ako ni Michael nga luyag niya sa Bombo Radyo Bacolod magsungka bangud nahadlok ini nga makastiguhan kag posible nga luthangon man siya sang mga kapulisan.
Samtang ginpahayag man sini nga napilitan man siya nga magpalagyo upod sa tatlo ka iban pa bangud nga wala man siya sang sala apang ginpriso ini.
Madumduman nga naaresto sa buybust operation si Peñoso sang Disyembre 1, 2019.
Apang suno diri, gin-pick-up lang ini sang anom ka mga tawo nga nakasakay sa scooter samtang yara siya Purok Kagaykay, Brgy. 2 upod ang iya mga abyan.
Pagkatapos siya nga ginkuha sa Kagaykay, gindala siya sa Purok Langis. Brgy. Banago kag didto gin-plantedan sang mga ebidensya kag ginpatigayon ang recoveries.
