Ginpakigbahin sang Pinoy sa Japan ang mga nangin hitabo sa Tokyo 2020 Summer Olympics kahapon ilabi na ang hampang sang mga Pinoy.
Suno kay Josel Palma, Bombo International Samurai Correspondent sa Tokyo, Japan, nagumpisa ang paghampang sang boksing sang pambato sang Pilipinas nga si Nesthy Petecio kahapon.
Ang nakasumpong sini amo si Sakobi Matshu Marcelat sang Dominican Republic of Conggo.
Ginpakigbahin sini nga umpisa palang nagbuya na sang wala kag tuo nga inumol ang player nga nagtuga sa pagdeklarar sa iya nga daog matapos ang round 3.
Ginpakigbahin man sini nga nangin masubo ang resulta sang hampang ni Remedy Rule para sa swimming.
Si Rule ang naghampang alas-6:28 sang hapon sa 100 meter butterfly nga nakabahin sa 2nd hit kun sa diin siya man ang 2nd placer.
Ang nagpanguna amo ang swimmer sang Ireland nga si Ellen Walshe sa oras nga 59.35 seconds samtang si Rule naman ang may oras nga 59.68 seconds.
Apisar nga naqualify sa 2nd hit, nangin masubo naman bangod wala nadala si Rule sa top 16 sang overall tally.
Ginalantaw naman nga sarang makabawi ni Rule sa paghampang sini sa 200 meter butterfly kun sa diin sarang ini ma qualify kag makadangat sa finals.
Apisar nga wala naman nakuha sang paul vaulter nga si Carlos Yulo nga top spot sa floor exercise event, sulod gihapon ini sa finals sang men’s vault event sang men’s artistic gymnastics.
Samtang ginakasubo man ni Palma nga indi na makapadayun ang Japanese Gymnastic Star nga si Kohe Otsimura nga ginabansagan nga The Greatest Gymnast isa ka gold medalist kag holder sang napulo ka iban pa nga medalya sa nagkalainlain nga torneyo.
Masubo naman nga sa katapusan sini nga pag-entra kag natalana nga pagretiro, wala siya makasulod sa finals.
Si Otsimura ang all around 2012 kag 2016 Olympic Champion.
Nakanselar naman ang beach volleyball kahapon sa tunga sang Czec Republic kag Japan matapos nga magpositibo ang isa ka player sang Czech Republic sa COVID-19. Samtang, may pila pa ka nabilin nga mga atleta ang Pungsod Pilipinas nga hugot sa gihapon nga ginalauman ang makakuha sang bulawan nga medalya sa Tokyo 2020 Summer Olympics.
Suno kay Josel Palma, Bombo International Samurai Correspondent sa Tokyo, Japan, alas-8:00 sang aga nagaumpisa ang mga pahampang kag nagatakop alas-9:00 sang gab-i.
Ginasugat naman ang mga ini sang pribado nga salakyan bangod wala ang mga ini ginapahanugutan nga magsakay sa public transport, kag gilayon nga ginadul-ong sa bubble.a
Ginadumilian man ang mga ini nga magsight seeing.
Ginpakigbahin man ni Palma nga dako ang ekspektasyon ni Samahang Weightlifting ng Pilipinas president Monico Puentevella nga masungkit ni Hidilyn Diaz ang bulawan nga medalya.
Ini bangod beterana na sa Olympics si Diaz kag ini na ang ikaapat sini nga pagpasakop.
Nakaangkon man sang silver medal si Diaz sa nakaligad nga 2016 Rio Olympics.
Suno kay Palma, ini na ang 100 ka tuig nga pagpasakop sang Pilipinas sa Olimpyada apang wala pa nakakuha sang gold medal ang pungsod.
Ang pinakamataas nga naangkon sang Pilipinas amo ang silver medal nga nadaog ni Diaz.
Samtang ginalauman man ang pagsungkit sang bulawan nga medalya sang iban pa nga mga atleta kaangay sang golfer nga si Juvic Pagunsan nga nagtraining man sa Japan kag kabisado na sini ang golf lane sa lugar kasubong man ang half Filipina-half Japanese golfer nga si Yuka Saso.
Indi naman mabastabasta ang 20 anyos nga si Yaso bangod dekalibre naman ini nga player sa golf sa iban nga pungsod.
Isa pa sa gibantayan ang sensational athlete nga si Marigielyn Didal, isa ka skateboarder.
Si Didal ang isa man sa ginalauman nga makaangkon sang gold medal bilang anay gold medalist man sa Sea Games.
Paathag naman ni Palma nga kun kis-a, may mga player man nga wala ginalauman nga magdaog, amo pa ang makasulod.
Ginakasubo naman sini nga nadula na ang tyansa ni Kurt Barbosa matapos nga totally eliminated na ini sa pahampang.
Nagpasalamat naman ang atleta sa tanan nga nagsuporta sa iya kag ginpahayag man sini nga ginhemo nya ang sarang niya nga masarangan.
