Ginpahayag ni Presidential aspirant Ferdinand “Bongbong” Marcos Jr. nga pabor ini sa pagrelease sang iya Statement of Assets, Liabilities, and Net Worth (SALN) sa publiko kun siya ang magdaog sa 2022 Elections apang ginpahayag nga prerogative ini gihapon sang isa ka government official.
Sa presidential debates nga ginhost sang Sonshine Media Network International (SMNI) nga ginapangunahan ni Pastor Apollo Quiboloy, ginpahayag sini nga indi problema sa iya nga irelease sa publiko ang iya SALN.
Suno sa presidential aspirant, wala lang ini nagasulat sang SALN sa nagligad nga anum ka tuig apang kun siya ang mapilian sa magaabot nga eleksyon, magahimo ini sang SALN kag igahatag sa publiko kun ini ang pangayuon sa iya.
Gindugang man sini nga ang desisyon ang daat magadepende gihapon sa elected government official.
Sa idalum sang to Article XI, Section 17 sang Constitution, tanan nga public officers kag mga empleyado ang required nga magpasa sang deklarasyon sang ila assets, liabilities kag net worth sa idalum sang oath.
Nakabutang man sa layi nga ang Presidente, bise-Presidente, mga miyembro sang Gabinete, Kongreso, Supreme Court, Constitutional Commissions kag iban pa nga constitutional officers, kag mga opisyal sang armed forces nga may general ukon flag rank ang dapat idisclose sa publiko ang ila declaration.
Suno kay Marcos, desisyon niya ini bilang indibidwal kag para sa iya, indi na dapat kinahanglan nga islan ang layi kag yara na sa kada opisyal kun handa ang mga ini nga idisclose ang ila SALN.
Gin-athag man sini nga kun siya ang liwat ang magasulat sang SALN, iya ini pagahimuon nga public information.
Pabor man ang tanan nga presidential bets nga nagtambong sa nasambit nga debate sa pagrelease sang ila mga SALNs.
Sang ginpamangkot naman kun okay lang sa mga ini nga irequire man ang ila pamilya sang SALN, ginpahayag ni Marcos nga ang public officials lamang ang required kag indi ang private family members.
Ginpahayag man sini nga kun may himata ini nga nagapungko kag nagasulat sang SALN, nagapati siya nga handa man ang mga ini nga magdisclose.
