Nag-umpisa na ang booster shot sa mga medical frontliners sa syudad sang Bacolod sang Nobyembre 17 samtang ang sa senior citizens naman ang natalana sa Desyembre 6 kag Desyembre 13 para sa mga may comorbidities.
Suno kay Em Legaspi Ang, Executive Director sa Bacolod City Emergency Operation Center (EOC) ang A1 sector palang ukon ang mga frontline healthcare workers ang gin-una sang Department of Health (DOH) sa pagbakuna sang 3rd shot nga nag-umpisa sang Nobyembre 17.
Masunod naman diri ang Desyembre 6 kag 13 nga para sa mga senior citizens kag may comorbidities nga mga Bacolodnon.
Paathag ni Ang nga pagbakuna sang booster shot ang voluntary lamang gani sarang lang nga makapangindi ang indi luyag magbatun.
Apang ini ang ginapanugyan naman sang syudad ilabi na sa mga nagatrabaho sa frontline healthcare service nga naga-atubang sang mga pasyente nga may COVID-19.
Pasalig naman sang Executive Director sa EOC nga wala sang mga nakabatyag sang serious adverse reaction sa mga nabakunahan sang COVID-19 vaccine sa Bacolod City humalin sang gin-umpisahan ang vaccination program sang Marso 5.
Una man nga ginbakunahan suno diri ang mga doktor.
Paathag ni Ang nga may mga nakabatyag sang mild allergic reaction apang wala sang seryoso ang ginbatyag bangod sa pagbakuna.
Suno diri, ang kabug-usan nga frontline healthcare service workers sa Bacolod City ang ginabanta kapin 15 mil kag amo man nga numero ang ila ginalauman nga magabatun sang 3rd shot.
Sa pihak nga bahin, padayun man ang pagbakuna sang City Government sa mga remote areas ukon sitio kag purok nga malayo na sa syudad.
Ginapakamaayo ni Ang nga madamo sila sang nakumbinsi nga magpabakuna sa mga mabudlay lab-uton nga kumunidad.
Natukiban man sang mga ini nga madamo sang mga wala nagpabakuna gikan sa mga far flung areas ang bangod lang sa nalayuan sa vaccination centers ukon wala sang magamit sa pagbyahe padulong sa vaccination site.
May ara man nga indi luyag magrisgo nga mag-absent sa trabaho agud nga magpila sa vaccination program.
Suno kay Ang, ginpadulungan nila ang mga malagyo nga Barangay sang weekend agud didto na mismo magapatigayon sang pagbakuna kag madamo man sila sang nabakunahan.
Nagalaom naman ang EOC nga sa maabot nga 3-day National Mass Vaccination Campaign sa Nobyembre 29, 30 kag Desyembre 1, dako nga numero sang mga Bacolodnon nga wala pa mabakunahan ang magdesisyon na nga magpabakuna agud nga malab-ot na sang syudad ang 100 persyento sang mga eligible population.
